رياضةسلايدر

ويجز يغني في حفل نهائي كأس العالم بقطر

في حفل ختام بطولة كأس العالم فيفا قطر 2022، غنى مطرب الراب المصري ويجز، أغنية الحفل الختامي اللي صدرت قبل أيام من النهائي “عز العرب” بين شوطين مباراة النهائي، وبالمناسبة كانت شاركت السوبرانو المصرية فرح الديباني في غناء النشيد الوطني لمنتخب فرنسا قبل بداية المباراة.

– بعد تشكيك وكلام كتير، غنى ويجز بالفعل الأغنية اللي كانت باللهجة المصرية، ومن ضمن كلماتها “بعد غيمة ضحكتلي الشمس، ورفرف يا علمي أعلى وجدد أملي”.

– أحمد علي أو ويجز (24 سنة) مطرب شاب بدأ شكل الغناء المميز اللي بيأديه من منطقته، الورديان بمحافظة الإسكندرية، وتمسك بموهبته في الغناء.

– وجود ويجز في حفل اختتام كأس العالم محصلش بالصدفة ولا كان وليد الحظ، بل كان نتيجة طبيعية لنجاحات متتالية، بعد سنوات من انتشار أغانيه في مصر خاصة بين فئة الشباب، بل حتى على مستوى عالمي، فمثلا أغنيته الأشهر “دورك جاي” احتلت المركز التاني في قائمة الأغاني العالمية في تطبيق ساوند كلاود، ولسه لحد الآن بتحقق ملايين المشاهدات على موقع يوتيوب وصلت لـ103 مليون مشاهدة.

– وإن كانت الأغنية دي بمثابة الانفجار لمطرب الراب المصري، لكنه كمل في مشواره وحقق المزيد من النجاحات، آخرها لما كان الأكثر استماعًا في الشرق الأوسط على تطبيق سبوتيفاي بأغنية “البخت”.

– وجود ويجز في الحفلة بالتالي مكنش مجاملة ولكن بناءً على نجاحه واجتهاده وحب الناس الكبير له وللي بيقدمه، والحقيقة اللي يهمنا هنا أنه الجمهور في الملعب كان فرحان وبيتفاعل مع الأغنية والناس اتبسطت.

– وأكيد شئ جميل جدًا أنه الشاب المبدع ويجز يكون أول عربي يغني في حفل ختام المونديال، والحقيقة إحنا كمصريين فخورين جدًا بدا وإن أغنية بلهجة بلدنا بيسمعها العالم كله.

– اللي زي ويجز المفروض أنه مكسب بالنسبة للبلد يستحق التقدير، لإنه واضح قد إيه دعم المواهب من الشبان دول مهم ومفيد وله عوايده على البلد، خاصة لو تم استغلاله في مجال السياحة.

– آه فيه ناس كتير متعرفش عن اللي بيغنيه ويجز وكل اللي بيسمعوه هو اسمه، وناس اكتر مش بيعجبها اللي بيقدمه، لكن ده طبيعي، كل المغنين والفنانين اختلف الناس عليهم، لكن لازم نحترم اللي بيقدمه مبدع شاب زي ده أيا كانت أذواقنا، خاصة لما نشوف له جمهور كبير وواسع زي ما إحنا شايفين.

– لذلك الطبيعي إننا بدل ما نحاربه أو نشكك في إمكانياته أو نقلل منه، إننا ندعمه وغيره كتير، ونرجع ونقول الفن مش محتاج تصاريح ولا ورق ولا روتين، ومحاولة تعطيل ويجز وغيره بالطريقة دي مش مفيد أبدًا وبيخسر البلد كتير.

– مجددًا تحية لأحمد علي ويجز، ولفرح الديباني، رفعتوا اسم مصر في حدث مهم غبنا عنه، ومش هنبالغ لو قلنا إنهم عوضوا كتير من المصريين عن غياب منتخبنا لكرة القدم، وبالتوفيق لكل مصري مجتهد في أي مجال.

مقالات ذات صلة

زر الذهاب إلى الأعلى