احمد فتحي
بعثت الطبيبة اماني الشيمي أخصائي طب الاسرة، رساله الي السيد رئيس الجمهوريه الرئيس عبدالفتاح السيسي
والي وزيره الصحه، جاء فيها
انا مقدره جدا وضع الدوله الاقتصادي والمادي وكل حاجه
ومقدره وضع زملائي الأفاضل في مستشفيات العزل وربنا يقويهم مهمتهم صعبه جدا هم في بؤره المرض ويتحملون ما لا يتحمله أحد
بس طبعا اكيد الوضع بدأ يتضح وان الوضع غير مستقر والاعداد في ازدياد شديد
ودا واضح لو علي سبيل المثال انا في قريه صغيره من ضمن اداره تحتوي ١٦ قريه
في هذه القريه ٥ حالات إيجابي ومخالطين أكثر من ١٠٠
ما بالك باقي الدوله … لدي عده اسئله
لو سمحت سياده الرئيس
اديني خطه امشي عليها انا ك طبيب اسره مسؤل عن مركز طب اسره في اداره….
يعني انا بشك في حالات واعمل تحاليل واشعه فيه اللي بيقدر يعملها وفيه اللي مش بيقدر ومش هيرجع تاني
المهم وبناء عليه برجح بنسبه كبيره انها اشتباه والمفروض احول الي مستشفي فرز مثل الحميات والصدر لحد كدا تمام
من اكتمال العدد في هذه المستشفيات بياخدوا مسحه ويرجعوا بيوتهم ….
الناس دي عليها أعراض ممكن تنازلي بروتوكول انا كوحده صحيه اني اعرف اتعامل مع حالات mild و moderate واقولهم اقعدوا في البيت …
الموضوع مش سهل ان المريض يروح حميات او صدر ويرجع البيت يقعد يومين لحد اما النتيجه تظهر وبعدين يطلع إيجابي …..
لو سمحتوا نزلوا بروتوكول الوحدات الصحيه للتعامل مع حالات الإيجابي وعلاجها كمان
متقوليش ان مخالطين الإيجابي انزل اعملهم دعم نفسي
اولا هم مش هيقعدوا في البيت رغم اني بشدد انهم يقعدوا وبشيلهم المسؤليه بس للاسف مش هيقعدوا
وثانيا احنا اللي في الشارع ومش عارفين ايه النظام ….
اللي محتاجين دعم نفسي هو احنا والله
عذرا سيدي الرئيس انا لم أذكر أن الوقائيات الشخصيه بوفرها لنفسي وللمسؤلين مني ……
انا بس محتاجه اشاره او ضوء من بعيد يشعرني ببصيص امل ….
اما عن استقالتي في القريب العاجل اول اما اطمأن علي اهلي ستكون اول خطوه اعملها …..
انا منتظره رد سيادتكم
احنا كاطباء اسره وتكليف المفروض نعمل ايه بالضبط وكلام واضح وصريح
اما عن مستشفيات المركزي اللي عيادتها نقلت في الوحدات الصحيه معلش مش عارفه دورهم ايه في دائره الكرونا الملعونه
شكرا واسفه علي الاطاله
د. اماني الشيمي
اخصائي طب اسره كنت علي امل اوصل استشاري قبل ما اموت بس الكرونا قضت علي أحلامي
