طبعا السؤال اللي نط في دماغك، إزاي مصر بتصدر قمح وهي أكبر مستورد للقمح في العالم، وأكبر دولتين بيوردوا لها قمح روسيا وأوكرانيا؟
الإجابة إن اللي بيصدر قمح أو دقيق في مصر هو القطاع الخاص، اللي عنده مزارع أو أراضي بيتحكم في إنتاجها بشكل حر، زي ما تزرع خضراوات أو فاكهة للتصدير، بصرف النظر عن حاجة السوق المحلية أو عجز أو خلافه، وفي الغالب القمح الخاص ده بيتصدر منتجات زي الدقيق الفاخر والمكرونات بأنواعها عشان يجيب أرباح أكتر.
أما اللي بتستورد فهي الحكومة، عشان تكفي الإنتاج المحلي خصوصا لوزارة التموين، متمثل في رغيف العيش.
محمد سعيد خسكية
إنتاج مصر من القمح حوالي 9.4 مليون طن، واستوردنا عليهم حوالي 12.9 مليون طن سنة 2020، وده في الوقت اللي الحكومة بتسعى لزراعة أصناف معينة من القمح عالية الإنتاجية بتوصل لـ 30 أردب للفدان.
