امبارح بس
فوجئت بإني كدبت كتير
حسيت إن أنا حبة أكاذيب
ماشيين ع الأرض
من أول طرحة راسي
اللي أنا ورثاها بدون تفكير
و لـ حد ميلادي المثبت بالأوراق
من بعد ما جيت الدنيا بـ شهر
و لأول مره أحس
بـ تقل الشنطه اللي أنا شايلاها
في كتفي بقالي سنيين
و لأول مره أشوف
الصوره اللي أنا فرحانه بضحكتي فيها
ما تعجبنيش
و الصوره اللي أنا رفعاها بفخر
على الفيس بوك
و الصوره اللي انا حطاها
في برواز فخم
علشان الداخل بيتي يشوفها
في أول طله و يعجب بيا
امبارح بس فوجئت
إن أنا مش هي
و سهرت لـ حد الصبح أفكر
و اسأل روحي أنا مين
و أفر في كل الصور
اللي في ألبومي الضخم
يمكن ألقاني في صوره
ما بين عشرات الصور
اللي انا شايلاها بحرص
و لاحظت
أن انا بـ اتعمد أضحك
كل ما عيني تشوف الكاميرا
و كأنني عايزه أتاكد
بعد مرور الوقت
إني انا عشت
امبارح بس
فوجئت إنى كدبت
إمبارح بس
لاقيتني هناك
مزوية في صوره قديمه
أبيض و أسود
مع إنها صورة طفلة بسيطه
و شعرها هايش
و ملامح هاديه
و عيون بتبص بكل براءه
في عين الكاميرا
فشافتها الكاميرا بجد جميله
برغم إنها ما كانتش بتضحك
لـجل الصوره ما تطلع حلوه
كات تضحك بس
لما تحس إنها فرحانه
ما كانتش اتحطت لسه في خانه
كان أكتر لون بتشوفه في يومها
اللون الأخضر
و العالم بالنسبه لها
البيت الني
و غيط القمح
و شجرة توت
تاكل منها لـ حد ما تشبع
ما كانتش ساعتها عرفت تحسب
1+ 1 كـام
و لا حفظت لسه قانون الضرب
و لا عرفت تطرح بالناقص
كانت أكتر ماده بتكرهها
هي الحسابات
و كانت أكتر ماده تذاكر فيها
و تنجح و تجيب مجموع
علشان اتلسعت كام مره
على كف إيديها بقسوه من الاستاذ
من يومها فهمت
إن العالم أكبر من تفكيرها
من يومها اتغير حالها
من مادة زرع و حصد
لـ مادة ضرب ..
و طرح ..
و جمع ..
و حقق إنجاز ..
من يومها عرفت إن العالم
مليان ألغاز
و عشان ما يمر اليوم بسلام
كان لازم تصبح شاطره
في حل الألغاز
من يومها عرفت
إن بـ كدبة بسيطه تفوت من مأزق
وازاي تقول انها بـ تحب
و هي بـ تكره
و ازاى تتبسم حتى و هى حزينه
و ازاي الكلمه الحلوه
بـ تفتح باب
و يمر الوقت
و تفوت من باب
يسلم باب
في الاخر سلم لمتاهه
و تاهت روحها
إمبارح بس فوجئت
إنها محتاجه تلملم روحها
من المتاهات
إمبارح مر حرامي بسرعه
و خطف الشنطه
كان فيها بطاقتي الشخصيه
و مرتب شهر
و قصيدة شعر ما كملتش
عن ثورة يونيو
و علبة مكياج
باتوهم إن أنا بيها
ممكن أداري خدوش الحزن
و إزازة عطر
برواغ بيها شعوري المبهم بالوحده
و ضيقة نفسي من ريحة الكدب
القافلة كل المسامات
و موبايل سامسونج ديما بيهنج
من كتر ما حط و شال في الكدب
و مرايا من طول عشرتها معايا
ما بقتش بتعكس ليا
غير الصورة اللي أنا عايزاها
في المحضر لما سألنى الضابط
عن اسمي و سني
قلت له ما اعرفش
الراجل دقق حبه في صورتي
و قال .. الاسم : حنان
زوجه .. مسلمه .. مصريه
علقت الشنطه في كتفي رغما عني
و مشيت و أنا حاسه إن أنا مش هي
, , ,
